藝文頻道粉絲團
您即將進入之新聞內容 需滿18歲 方可瀏覽。
離開
進入【自由副刊．台語日常】 劉靜娟／我講一个笑話予你聽
圖◎黃子欽
◎劉靜娟 圖◎黃子欽
孤單的局外人
老同學做伙，上熱的話題是健康和病痛。
有人講伊開十外萬去做白內障手術，效果並無比用健保的人較好。
有人講伊種喙齒，嘛開一、二十萬。
有人講伊每六個月需要為著跤頭趺（kha-thâu-u，膝蓋）注一針玻尿酸；若無，行路就哀哀叫。
有人講伊早就去開刀，換髖關節矣！
有人講伊做大腸鏡檢查，雖然結果無啥大問題；毋過，啉清腸的藥水就驚死……
有人講：「恁講的攏小可代誌啦，若毋是阮囝警覺，送我去急診，我頂個月就曲去（過世）矣！這陣，我的心臟安六枝心血管弓仔（支架）！」
愈講愈重鹹，親像咧比啥人的病史較「偉大」。有影若人講的：人的一生和人比的，自學歷、經歷、財力，到病歷。阮這陣已經行到比病歷的階段。而且，比袂siān（厭倦），遮的話大部分聽過，逐家閣提出來餾（liū，複習）。
有人呵咾我無老倒勼（kiu，縮），龍骨和骨密度應當猶袂bái（差）。
輸人毋輸陣，我講我「心律不整」。
「彼無啥啦，我的心臟嘛不時亂亂跳。」
一聲就輸去，我趕緊講幾個月前我為著「坐骨神經痛」捙跋反（tshia-pua̍h-píng，折騰），中醫、西醫攏看過；一百公尺攏無法度好好仔行，愛一遍一遍坐落來歇睏，若無通坐，就假影縛鞋帶抑是鞋底有石頭仔，身軀向（ànn，彎）落來，跍（khû，蹲）落來，才會當暫時止痛。
痛起來的時，擋袂牢，會若響尾蛇按呢嘶嘶叫；免講目憂目結，人無元氣，隨老十歲。
可能我講得有動作，有表情，閣有自喙齒縫suh（吸）入去的嘶嘶聲，無人講「彼無啥啦」。
莫怪人講，有年歲就愛有一、兩種病，才袂無話通和人開講。好哩我有「坐骨神經痛」，這工，我才無變做孤單的局外人。
我講一个笑話予你聽
講著《拾穗》，逐家可能會去想著法國名畫家米勒彼幅三个查某人彎腰咧抾零星稻仔穗的名畫；毋過，我講的是已經停刊三十外年的雜誌。
我少年的時每個月會佇員林圖書館借這本綜合性雜誌，伊的內容包括科學新知、音樂評論、名畫紹介，內容豐富，水準也懸（高）。
彼時陣，對文學藝術當熱情。因為這本雜誌，我對貝多芬、華格納、蕭邦；歌德、但丁；達文西、米開朗基羅；拿破崙、希特勒等等重要人物，才有基礎的概念。也才會去借荷馬史詩《奧德賽》和《伊利亞德》，歌德的《浮士德》和彌爾頓的《失樂園》遮的文學名著來讀。後來，也去買《拾穗》出版的《西洋歌劇的故事》、《交響樂的故事》。
彼陣，禮拜日有一个節目，敢若叫做「西洋歌劇欣賞」抑是「古典音樂欣賞」。阮兜（tau，家）無la-jí-ooh（收音機）；所以每个禮拜早起，我會自公園這頭行二十外分鐘去公園彼頭阮屘姨兜聽。屘姨hân-bān（笨拙）煮食，閣有大姊通靠，過年過節，阮媽媽會替伊炊甜粿、包肉粽。我和小妹提去，就順紲（sūn-suà，順便）聽la-jí-ooh。
《拾穗》雜誌會佇每篇文章空白的所在刊短短的小常識抑是笑話。逐遍提著雜誌，我會先去讀這「補白」的短文。有的笑話予我笑了閣笑，也會講予同學聽；我的「幽默感」無的確是彼陣發穎（萌發）的。
彼个年代，阮兜環境無好，老母是厚操煩的個性，欲晟養七个囡仔也確實無簡單。有時看伊憂頭結面，我娛樂老母的步數是：「媽，我講一个笑話予你聽。」
有的笑話會當予伊喙笑面笑，有的笑話伊無啥了解，會問：「伊哪會按呢？」按呢，嘛算有解鬱的效果。
到今，和朋友破豆，有時我猶會講起少年的時讀過的笑談。笑話先佇我頭殼內「發作」，我慣勢講未完甚至猶未講，家己就笑甲袂收煞；朋友講我「笑點低」，講笑話的「前奏」比笑話本身較笑詼。
凡勢也是少年的時愛讀笑話的啟發，我才比別人較容易看出一个人抑是一件代誌心適的所在。
我個人的感覺
和玉蕙互相寄稿「掠漏」，攏用電子信箱；昨昏，伊講我哪會無贊成用面冊私訊寄？彼毋是較方便？面冊不時會去巡啊。
我無贊成用面冊寄稿？其實，一、兩年前，我是講無愛用面冊投稿予報社。
我按呢講，是因為感覺用面冊投稿較「凊彩」，敢若穿便服、布鞋；用Email較正式（穿套裝、皮鞋？），較尊重。若有附相片，尤其愛用Email，相片才袂予人縮小去。
我是「慢熟」的人，自少年就綴（tuè，跟）袂著流行；迷你裙、阿哥哥裙、喇叭褲，攏愛看慣勢、熟似矣，才會去穿。所以，等我敢穿、會穿的時，新的流行可能已經出現矣。好佳哉，中年以後，無關心流行，才袂有「退流行」的困擾。
生活用辭，我也時常慢人幾若步。
可比聽人講抑是寫「老公」、「老婆」，我就有意見：「華語的『妻子、丈夫』，台語的翁、某，翁婿、家後，牽手和華台語通用的先生、太太敢毋是較好？較文雅？」
毋過，畢竟草猴（螳螂）無法度擋車，這幾年，「老公」、「老婆」已經是足普遍的稱呼。「時勢必然」，只好姑不而將投降。也袂家婆，去共人宣導我的理念。
對科技產品的接受，也著沓沓仔來。
這陣，我猶是用Email寄稿，毋過，袂「無贊成用面冊寄」；我的觀念有「進化」矣。朋友之間用面冊寄稿互相掠漏閣較無要緊；甚至用LINE（穿短褲、淺拖？），也袂反對。
啊是按怎用面冊寄稿就是較凊彩？較無尊重？純然是我個人的感覺爾。●
網友回應