藝文頻道粉絲團
離開
進入【自由副刊】 林蔚昀／囡仔眠夢ê時，in leh創啥？
◎林蔚昀
◎林蔚昀
．
一个媽媽洗衫、摒掃，雖然大樓規定十點了後袂當吵著別人。
一个媽媽攢明仔載上課愛用ê物件，用LINE回覆學生ê媽媽。
一个媽媽已經睏去，伊透早愛起來，攢囡仔愛食ê便當。
一个媽媽睏佇囡仔身軀邊，雖然伊進前講：「我干焦陪你五分鐘，我有足濟工課愛做。」
一个媽媽摸囡仔ê頭殼額仔，看伊敢有閣燒起來。
一个媽媽寫文章，伊ê編輯已經無法度等矣。
一个媽媽佇工廠，伊毋知影伊ê囡仔睏去未，in佇足遠ê所在，佇海ê彼爿。
一个媽媽佇超級市場，買家己佮囡仔ê宵夜。
一个媽媽佮翁婿冤家。
一个媽媽予人拍。
一个媽媽拍一个猶未睏ê囡仔。
一个媽媽佮翁婿行房，雖然伊無愛。
一个媽媽睏佇別人兜，伊ê囡仔佮翁婿足久無看著伊。
一个媽媽倒佇十字路口，塗跤有血。
一个媽媽佇病院，救別人ê性命。
一个媽媽出力共囡仔生出來，伊ê某共伊加油。
一个媽媽共伊ê囡仔囥佇糞埽袋仔擲掉。
一个媽媽佇養老院，思念伊ê囡仔。
一个媽媽予囡仔刣死。
一个媽媽刣死囡仔。
一个媽媽睏袂去，雖然伊足忝ê。
一个媽媽看戲齣，足有精神。
一个媽媽等囡仔轉厝。
一个媽媽揣袂著轉厝ê路。
一个媽媽睏佇路中央，夢著伊leh唱：「嬰仔嚶嚶睏，一暝大一吋⋯⋯」
．
暗暝盡尾，天猶未光。
網友回應