◎康原
．
一陣一陣流浪的 風
吹入 小西彎彎曲曲的巷仔底
彼個 頭毛白白的地理仙
喙角全波 講著蜈蜙吐珠
葫蘆吸收露水 佮古城池
趣味的傳奇
．
一代一代各種族群的 人
Ui3北爿拱辰行到西爿的慶豐
行出 小西巷的名號
這巷底 惦真濟好額地主佮紳仕
醫生巷有 楊克煌佮謝雪紅的
精采 愛情故事
．
一間一間無共款的 店
醉鄉 酒香佮菸味沉落彰化人的記持
高賓閣 賴和飲酒的身影變成一首一首的詩
鐵道詩人 錦連失落夢想的天地
善道堂 有收驚婆卜龜卦的聲音
汀州會館 定光佛有靈閣有性
．
一頁一頁變遷的歷 史
紅葉大旅社變囝仔thit 迌物仔來
揣回 真正阮細漢的時代
三和旅社 有小西咖啡的芳味
彰化三寶 肉丸 爌肉飯 貓鼠麵
人客 一攤食了閣一攤……