您即將進入之新聞內容 需滿18歲 方可瀏覽。
【自由副刊】吳桑源/福氣家己趁
◎吳桑源
◎吳桑源
前幾日仔佇報紙標頭看著「耳空中風」的健康議題,第一時間是咧想:「敢有遮譀古的代誌!耳仔嘛會中風?」斟酌共看一下,這種雄雄暫時的臭耳聾是因為病毒感染、耳空內血筋有問題。嘛有可能是家己暗時顧耍拚暝工、生活壓力大造成的。老大人佇咧寒人溫度懸低變化大的時嘛著愛注意。
原來目睭看袂著,愛照鏡才看有的雙耳遮爾仔重要。
自細漢我就是大耳仙、耳珠像塗豆仝款飽仁,親情朋友看著攏講這个囡仔生做福相福相,真有福氣。老母若是佇身軀邊,會歡喜閣臭屁咧摸我的耳仔,講家己??生嘛希望大耳會予阮囝過著無煩無惱、平安富貴的一生。
媽媽燒烙的手中心,傳達一个做老母上大的向望。細漢,我會使感受著這種溫暖;大漢了後,了解著真濟代誌愛一步一跤印,實實在在做事才會當順順利利。
我真愛覆佇媽媽的大腿予伊撓耳屎。佇伊穡頭做煞,抑是暗時咧看無營養的八點檔的時,就會喝耳空擽擽,媽媽心肝內嘛是知知,伊會挈耳扒仔,叫我覆咧,當當耳扒仔佇耳空內撓咧、撓咧的時,會有一種酥酥、麻麻的感覺,媽媽閣會佇耳空邊歕風,共我的耳仔挲咧、挲咧,無偌久我就睏去矣。
這是細漢上享受的代誌。這馬,我猶會大面神叫媽媽撓耳屎,干焦歹勢覆佇伊的大腿矣。
大耳敢有影就會平安富貴規世人?我毋知答案,毋過是堅信「骨力做,才趁會著好運」,想欲一步登天,食毋三塊豆乾就欲上西天是無可能的代誌。自細漢到今,受著厝裡的相伨和貴人的幫贊,予我佇修學位、食頭路的過程減少真濟困難,但是欲過較順意的生活,毋通袂記得著愛加上家己的拍拚才有法度。人咧講:「做牛著拖,做人著磨。」拖咧、拖咧,辛苦毋驚忝;磨咧、磨咧,白鐵會成針。艱苦開頭才會有快活收尾,福氣家己趁才會久長。
真歹了解耳空中風是啥物滋味,我一世人嘛無想欲體會。年紀是小可仔有矣,我嘛食老認老,暗時早早來去睏、注意食食,因為我閣欲用耳仔感受媽媽的愛猶有美妙的世界。●
網友回應