◎劉靜娟
畫圖老師講畫圖愛有膽。有膽，作品準做無好，猶有氣勢，會加真濟分；畫的時若驚驚，寬寬仔細筆細筆描，就予人看破跤手，根本無人會買你的圖。「總講一句，驚驚袂著等啦。」
我細聲講，阮毋敢想欲賣圖啊；閣再講，有膽無膽，少年的時就註定著矣，無可能改變。
邊仔的同學贊成我的話，講，「我就是無膽彼款人。免講袂去刣人放火，連共家己的囡仔講話都真斟酌。」
伊講囡仔細漢的時，毋敢拍，毋敢罵，成績bái，也毋敢講in飯桶；驚會造成囡仔一世人心內的陰影，「教囡仔的冊讀傷濟（太多）。」
伊紲落（接著）講，「到青春期，爸母一句話就可能予敏感的囡仔出走，甚至跳樓的新聞，嘛會影響著我；共查某囝講話，尤其愛輕聲細說。」
我講這陣in大漢，免遮爾緊張矣。伊講，「大漢矣，自尊心愈強，愈較袂講得；有時我足氣，想欲講重話，閣想著世間事無常，恐驚萬一我意外過身，我講過的重話，會予in艱苦一世人。」
哇，真正是一个無膽的人，莫怪伊連厝瓦都一筆一筆畫甲足整齊。●