◎劉靜娟
逐家（大家）攏畫甲遮爾好，我哪會攏袂進步！每遍看同學的作品，我就按呢怨歎。
一遍心內閣按呢想了後，問家己，「逐家？」
逐家是偌濟人？
想著囡仔讀小學的時，若吵欲買啥物件，就講伊的同學「逐家攏有」。
有一遍，伊講逐家攏有啥牌的鞋時，我問，「逐家？規班的人攏有？」
「無啦，差不多一半的人有爾。」
看伊一聲退遮爾大步，我感覺趣味，繼續問，「二十外人有？」彼陣，一班的學生有四五十个。
他想一時仔，「無遐濟，可能十个啦。」
我繼續和伊做心算，落尾伊講六个同學有彼款鞋。
「kan-na（只）六个，袂使講逐家。」
囡仔老實，袂曉講媽媽嘛是不時膨風，講「逐家」。
比論我會講，「逐家攏有法度早早寫好功課，你哪會遮爾gâu（會）拖！」
「逐家攏會聽老師的話，你哪會意見遐爾濟？」
到讀中學，伊講無愛做「順民」的時，我嘛是講，雖然學校╱老師有一寡規矩無適當，「逐家都會當接受，你哪會……」
「逐家」這个詞意思含糊，毋過真好用。敢若講出來，氣勢就大起來。●