◎雅子
.
最近聽人講
發電廠有枝仔冰生產
彼暗,我就夢見轉去宜蘭
踅過彎彎斡斡的北宜
看到龜山島才吐大氣
經過羅東、三星,我轉來到天送埤
.
一排低厝仔
自作木匠的阿公搬來遮
我出世佇轉角的菜擔
一口灶愛飼二、三十个人
孫仔賤到爬去厝頂掀厝瓦
冤冤吵吵,儉儉捻捻,頂真過生活
.
人講遮佮太平山的歷史牽作伙
埤仔內的水流落去安農溪
聽講生分的過去,若親像咧看戲
就親像人來客去的卜肉
擱有芳絳絳的蔥仔餅
彼當時,攏猶未時行
.
上愛軁入去阿堂的??仔店
一箍五角,揬糖仔抽紙籤
若甪到檨仔乾,吃甲嘴唇抹胭脂
阿母講賣粉圓的歐巴桑小姐
伊捌共阮老爸使眼尾
恬靜的西藥房,有一个緣投少年家
.
天送埤啊天送埤
目一??已經幾十年
翻新的火車頭,鬧熱的街市,敢抑會認哩?
阮是細漢離開的查某囡仔
伊的形影,是不是夢中的
記持的故鄉
.
天送埤啊天送埤
目一??已經幾十年
厝後的圳溝、幼稚園的栱鞦,敢擱有佇咧?
阮是細漢離開的查某囡仔
伊的面容,是不是夢中的
思慕的故鄉