◎隱匿
．
拄開始
這個世間
是由咱寶惜的物件
來組成的
．
沓沓仔
遮的物件煞來
一項一項
無去矣
．
遮的物件無去的時陣
親像嘛共咱的一部分
紮走矣
．
沓沓仔
咱的身軀
那來那輕
那來那通光
．
強強欲無法度
徛佇咧塗跤
．
毋管咱是感覺輕鬆
抑是空虛
攏仝款
．
反正世間是公平的
總有一工
咱嘛會完全消失
無去
．
無的確
到時陣才知影
咱來世間一逝
是佇咧耍對換的tshit迌
將咱寶惜的物件
和這個世間交換
．
猶毋過
咱換到的物件
攏是別人看袂著的
．
敢若是十五歲的時陣
拄著的彼片雲海
抑是和所愛的貓仔
做仝款的夢
．
益閣有詩
別人看會著咱的詩
看袂著咱寫詩的時陣
彼種歡喜
．
所以講無的確
等甲咱歲壽到矣
彼一工
越頭看
．
咱寶惜的物件
已經充滿著彼个
咱無去的世間矣
．