您即將進入之新聞內容 需滿18歲 方可瀏覽。
【自由副刊】 吳桑源/收驚
◎吳桑源
◎吳桑源
收驚又閣叫做硩驚,早期佇咱台灣民間真普遍,不管是神壇或者是大間廟寺攏有這項服務。恁若是身體各樣、煞著,抑是拄著囡仔著驚嘛嘛吼,揣先生仙治就治袂好,按呢可能愛換司公鈃鈃咧,無的確有效。聽講雄雄去予人嚇驚著,甚至是嚴重甲魂魄去予歹物仔攝去,攏有辦法。
話若是講透機,目屎是掰袂離。十偌年前學生囡仔厝裡火燒,拍火車來進前有兩个先走出來,大姊煞困佇火場活活燒死。消息隔轉工傳來學校,我的心情猶未穩定落來隨綴校長行東走西,若碌硞馬仝款。輔導學生,閣去殯儀館慰問家屬、協助喪事,麻煩的是愛面對記者的問題,想袂到第一改上電視是遮爾狼狽。全部的人攏安搭好勢我煞袂記得處理家己的心情。
了後,我注意著有一个查埔人的形影三時有陣會出現佇我的腦海中,斟酌共想……著啦!這个印象是我去殯儀館處理學生的代誌無意中去影著的一張相片。一時間凊雞母皮,心中驚惶,毋過我是鐵齒銅牙槽,想講是做好代,應該袂去予靈體纏牢咧才是。
真濟冬過去,伊有當時仔猶會現影出來。這改我將代誌的經過講予老母聽,老母講:「夭壽喔!你哪遮久才講,阿彌陀佛喔,暗時來予恁三叔收收咧。」
點香請示了後,三叔坐佇桌邊身軀搖搖擺擺、頭幌來幌去,動作愈來愈大……漸漸恬靜落來目睭沙微沙微講:「來,弟子有啥物問題?」「三太子啊,阮後生謼……」「卡遮爾久,歹辦喔!家私捎來。」
「拜請、拜請,拜請觀世音菩薩來收驚。頂無驚、下無驚,阮兜阿源無驚無膽嚇,心肝頭按定定。東無驚、西無驚,七星寶劍祀佇遮。風無驚、雨無驚,媽祖娘傘將你遮。你無驚、我無驚,請出五年千歲王爺,列祖列宗攏有聖……來!身軀踅出去看門口埕,袂使越頭。天兵天將來一班,金光聖母爍爁霆,手捏星斗做靈丹,收甲離離離,凶神惡煞走出去,逃千里。護送阿源三魂七魄,速速回歸、莫流連。閣來這是觀世音聖水,頭搭三下,胸坎、尻脊骿前三後七捋捋咧。天清清、地靈靈,我三太子佇遮,急急如律令,hah!」
「phuh──(喙霧水)好勢矣!較停仔去外口金紙燒燒咧,我開三張符仔,轉去三工暗頭仔燒燒咧化水了後啉落。」
盡了人事,轉來我毋敢違背天意,看老母將紙符仔點火,火烌沓沓仔虯做一隻會衝煙的烏龍仙,入水變做海龍王。這碗有眾神明加持照護的保命水,我是誠心共啖三喙,老母閣佇我的胸坎、尻脊骿頂下順順咧,喙裡念講:「咱吳家的祖先著保庇,無形的佮無緣的攏散散去,緊去投胎速速莫延遲,予阮囝兒逐日過好暝。」
講嘛奇怪,彼張相片的印象就慢慢仔霧去,心情漸漸敨鬆,若準無意中閣去想著,會使用較平靜的心態去面對。
以前我是死鴨仔硬喙桮,凡事是目睭看著才準算,濟濟代誌是用理性的角度去想去處理,經過這改神明的開破,我相信咱人類生活的這个空間猶有一寡仔無法度用科學去解說的代誌。去予三叔收驚就親像心理輔導仝款,佇咧啟發引導了後上重要的是愛去面對家己的內心,發心敬重天地間的性命。「若無行暗路,袂去拄著鬼」,自我檢討知影家己無做過啥物虧心行,萬項行了有正,心內著免驚。●
網友回應