【自由副刊】 康原／牛埔頭的彼陣海牛

◎康原

◎康原

．

佇牛埔頭紅天赤日頭的

中晝 風走去外海捒風車

雲尪仔踮天頂佮日頭覕相揣

海中 浮浪貢的流浪秀才

予藝術家牽轉來門口埕

變做一隻一隻看天食飯的

海 牛

．

想起 細漢老爸飼的彼隻水牛

透早 園內拖甘蔗去蔗埕交火車

逐工拖袂了 散赤苦痛的命運

反鹹 田園犁袂出止枵的糧草

綴牛 落田拖磨的爸母

做牛拖 做人磨

做雞筅 做人反

．

王功 有機冊店的藝術家

利用歹銅舊錫的廢棄物

編織伊對性命體驗出來的

價值 解說台灣人刻苦耐勞的牛精神

嘛對港口的風做出溫柔的報答

黃昏的時 白翎鷥飛入巢

垃圾的醫療團將蠔架仔 蠔殼仔

用繩仔綁誠海岸邊的木麻黃

守牢 彼片海坪的湳仔地

．

嗄龜喘的海風

偷偷來講 咱兜頂擺

拒絕 國光煙筒的湳仔地

即馬 財團肖想欲來種電火

大輪的風車插入 湳仔地

鳥仔毋敢閣飛來揣食

電磁波射入砂馬仔 花鮡

蠔仔 蛤仔攏嘛會死去

鹹水潑面的 鄉親

牛埔頭的這陣海牛

毋知 按怎活落去？

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法