瑠公圳
1765年郭錫瑠共性命流做美麗水圳
梘尾不止仔景美梘頭碧潭風景有水準
稻仔一叢一叢抽懸變做一棟一棟大樓
圳溝一條一條勼入去地下排水溝
轉去厝ê小路
經過溪埔阿婆跤步沉重鐵馬拖咧行
草ám kah若挐tsháng-tsháng ê心情強欲淹密身影
抾幾若日ê字紙kap歹銅舊錫換無三頓飽
風颱下昏暗會閣來門喙kánn會食水食kah飽
雷諾瓦
無欲uì輪椅peh起來行半步無欲了半點氣
驚疼風ê手ù過燒水猶無夠予人間加添半分媠
目睭ê調色盤為殕色ê人生調豔麗ê色彩
留落來ê圖繼續彩畫這个痛苦ê世界
鹿仔樹
自從梅花鹿消失tí台灣平埔
構樹ê花莓愈來愈成桑椹因為數念ê緣故
果子紅kòng-kòng若像草莓掛上樹枝
雖罔漢化真深猶是鼻會著古早ê塗味
夜鷺
日時假仙藏tiàm白翎鷥裡盹龜
暗時魚仔予伊掠了了人稱暗光鳥魚師傅
大水共規條溪淹淹去
覕起去厝尾頂大聲咻叫失去ê往事