◎沙山懷若
親像臍帶,將小漁村共大海結相連
榮河溝仔,一條小小的溪水
若是毋知伊過去的歷史
一定想袂到,伊曾經繁榮一時
會當撐一支竹篙划竹棑
算袂清的魚仔、蝦仔、猶有蟹仔
佇流水來的時陣
魚仔一群一群按溪口泅入來
不時飛跳,激起光白的水花
田嬰輕輕點著水面
烏燕斜斜佇咧飛
若毋是囡仔時陣的記持
敢講想會到
伊是一條遐爾仔清氣的溪水
這陣無人會閣相信伊的清氣
嘛袂記得伊原來的名字
臭水溝仔,一條淺淺濁濁
充滿著烏色臭味的水溝仔
連古早便所內的屎礐仔蟲
攏無法度佇溝內生存
榮河溝仔無閣清氣的溪水
兩爿嘛無閣青翠的樹木
共已經消失真久啦
來來去去的,竹棑的影跡
烏烏濁濁,無一絲絲仔生命的臭水
順著這條溝仔路
流出去肉粽角的水門
沿海坪竄對外海去
留落來的,彼逝彎彎斡斡的油光
佇夕陽反射當中,閃閃爍爍