【自由副刊】劉靜娟／【台語時間】 予人放生的魚

◎劉靜娟

七月底，有一條「趣味」的新聞：

尼莎風颱來的前一工，馬公第三漁港出現一大陣釣魚的人，逐家釣甲笑咍咍；因為，魚鉤仔起起落落，凊彩就釣有魚。

原來是布氏鯧鰺（俗名叫做紅沙）大陣相招泅來漁港；毋過，這毋是風颱的關係，是進前有宗教團體開三百萬箍買真濟魚佇澎湖放生；結果，放生無予魚過了較好，煞（suah，竟然）去予釣魚的人趁著。

請繼續往下閱讀...

看報紙頂的相片，親像有一站（陣）我買過的金鯧。去查一下，網路頂講伊的俗名有金槍、金鯧、紅鰺，正經無毋著。伊的形體和白鯧差不多，毋過金金的色水比白鯧較媠，肉質也幼幼；上重要的是，伊比白鯧俗（便宜）真濟。

比放生了後無偌久就予人釣去較慘閣較譀（hàm，荒謬）的是，放生的魚死了了。八月中一條新聞就講，新店碧潭水頂浮規百尾反（píng，翻）肚的死魚仔。在地船頭家講，有宗教信徒三不五時佇碧潭渡船頭和上游灣潭彼箍圍仔放生魚仔，「有當時仔才放半晡，魚就反肚；像遮爾熱的天氣，死魚仔真緊就臭，好山好水隨變款矣。」

聽講放生最大的原因，是「商機」；賣魚、賣龜的趁小錢，主辦的趁大錢。信徒想欲「做功德」，無去了解遐爾濟，嘛無去考慮in的放生是毋是顛倒害著生命，是毋是會破壞生態，放生的觀念佇台灣才會遮爾僫（難）改變。有一年，甚至有一个誠有名的媒體人佇一篇文章內底講，「月圓的時陣，阮欲出發，去放生新台幣五百萬箍買的、一萬四千斤的活魚。」

講甲敢若英雄欲出征，予人起雞母皮。過後，閣講參加放生活動，足感動。智識分子竟然按呢鼓勵放生，實在是真無智識！●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法