【自由副刊】 王羅蜜多／烏貓佇遐坐

◎王羅蜜多

文．照片◎王羅蜜多

「烏貓佇遐坐，無穿褲。」是早前留落來的粗俗語，一句爾爾，賰的（tshun － ê）家己想。

窮實，伊的原版是樂奏的一節，是古早奧地利軍樂隊長華格納做的《雙鷹進行曲》，咱早前的中學樂隊定定奏這條。

請繼續往下閱讀...

前日行過府城有名的露螺巷，雄雄影著一隻烏貓佇遐坐，姿勢足正經，毋但有穿褲，兼規身驅烏毛衫封甲密喌喌（ba̍t-tsiuh-tsiuh）。

烏貓完全無越頭看我，目睭無nih，貓鬚連動一下都無。我恬恬看伊一觸久仔，看起來雅氣恬才有風度，伊無綴人起起落落，搖尻川花，干焦恬恬佇遐坐。

我熟似一个文友K小姐，逐工寫詩文，攏無囥面冊，拍算以後做一擺發表。伊足愛貓，相關的知識也誠飽。比如頂工就共我講一隻異瞳貓鴛鴦目的故事，閣對裁縫貓、三色貓，講甲親像人面獅彼款無毛貓。

K小姐個性較實誠貓毛，命中帶（tài）貓神，毋過無飼貓。我查過幾若个貓小說寫甲足精采的人，竟然也是無飼貓。

露螺巷誠出名，是有文學佮歷史氣味的所在，葉石濤的跤步聲也敢若四常佇微風中來來去去。雖罔伊的小說有時陣也會有淡薄仔臭臊味，不而過，絕對毋是粗俗的「烏貓佇遐坐」。

我輕輕仔徙跤離開，越頭看彼隻烏貓原在佇遐坐，嗯，果然愈看愈成哲學家。●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法