【自由副刊．台語日常】 劉靜娟／早起時的笑容

◎劉靜娟

◎劉靜娟

早時運動了轉去，不時會佇青紅燈前拄（tú，遇見）著一个秀氣、好笑神的查某人。紅燈的時，我徛（khiā，站）佇一欉菩提樹仔跤，和「對岸」一欉菩提樹仔跤的伊相對看，相對笑；毋是禮貌上的微微仔笑，是真心開喙笑出來，心內想，「嗨，閣拄著矣。」青燈的時，阮行到斑馬線中央相閃身，就講一句相借問。伊講，「做煞（結束）矣。」我講，「你今仔日較早／晏（uànn）出來喔。」

然後，伊行去公園，我斡入巷仔轉去厝。

我毋是逐日去公園運動，毋知影伊是毋是逐日去；不過，兩、三年來，按呢見面的機會袂少，敢若變做熟似的人矣。

請繼續往下閱讀...

講熟似，其實猶真生分。

一日下晡時，我穿較整齊出門，拄著伊，看我和伊笑，伊講：「啊，真歹勢！一時無認出來。」

無仝的時間，無仝的場所，袂認得人真正常。我就是彼種對人面辨識能力較差的人；賣菜的若無佇菜攤後面、賣豬肉的若毋是佇肉砧後面，我就愛想足久才想會出in（他們）是啥人；雖然是看一、二十年的面。

所以，聽伊遐爾（hiah-nī，那麼）認真會失禮，講「真歹勢」，我笑出來。你對我捌（認識）偌濟？在我眼中，你除了笑笑的面，也是一張白紙啊。

不過，這種早時相見面的「儀式」，慢慢仔予我感覺著一種日常的幸福，講日常的美感也會使。透早會當看著親切美麗的笑容，心情較好；我的笑容一定也親切美麗，uì（從）心發出來的啊。●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法