【自由副刊】 林宇軒／大漢

◎林宇軒

◎林宇軒

．

欲按怎佮人解說大漢是啥？

彼當時我猶閣少年

透早出門，過橋去上課

母仔攢好的早頓卻袂記提

一个人頇顢演講，憨憨予家己創治

喙內的委屈無蓋輾轉

講袂出一句話

干焦知影歹勢

．

離離落落攏無要無緊

想看覓：一个人攑頭

看天頂西北雨直直落咧塗跤

一支小雨傘破去，澹澹倒佇路邊──

這小可仔代誌嘛無影響一个序細

提かばん佇身軀邊，四界去走傱

一條路沓沓仔行

一句話沓沓仔講

．

欲按怎去佮人解說？大漢佇外口

行路愛掛喙罨──看著新聞

心情就天烏烏。一切攏傷過簡單

遮濟物件來來去去

卻毋知家己佇佗位

揣無轉去的路，手機仔佇手內

嘛無敲電話：一个人

恬恬等待，目屎流袂落來

．

大漢，欲按怎去了解足濟物件

了解世界毋是食飯啉茶，歡歡喜喜

電視內底搬戲遐爾仔簡單──

是逐工冤家，相拍

為著未來去參詳設想

是予人講笑詼：

「以後你是欲食家己？」

嘛無改變我念詩寫字

．

大漢欲按怎講出喙？一个師大的學生

卻無愛佮父母仝款做老師

一世人教冊趁錢。想起彼當時

毋捌代誌，閣無了解啥物

是齷齪，啥物是忝，啥物是清氣……

想起彼當時，我手提著鎖匙

佇門跤口聽厝內的聲音

感覺規个城市閃閃爍爍

．

欲按怎佮人解說大漢是啥？

起起落落的跤步是夢中吹冷氣

一家伙仔坐車過橋，毋知欲去佗位

看偌濟時間流袂轉來

顛倒想著細漢時陣，食風食雨

攏當做是好耍。一个人無像這馬

慣勢住佇外口，規暝無睏，一个人

擘哈佇眠床，一个人冷冷等天光

．

註：細漢時定定坐阮爸的車過「大漢橋」，到這馬嘛毋知家己到底是大漢矣未。

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法