藝文頻道粉絲團
您即將進入之新聞內容 需滿18歲 方可瀏覽。
離開
進入【自由副刊】劉靜娟／【台語時間】 另外一个世界
◎劉靜娟
同學參加告別式出來，有一个規矩：逐家鬥陣去食飯抑是啉咖啡。一方面是借這个機會講一寡話，一方面是守著無講出喙的禁忌：離開殯儀館彼个場所之後，上好去一个「中途站」，莫直接轉去厝。
一遍和幾个少年的講起這个規矩，一个走（跑）社會新聞的記者講in若uì命案現場離開，會斡去警察局行行咧，因為遐陽氣較旺。「有的人講遐是一个正氣正義的所在，歹物仔毋敢倚來。」伊隨笑出來，「彼个所在，烏暗的代誌嘛袂少啊。」
一个講，「做兵的時，營區若有奇怪的代誌發生，頂頭的攏講軍帽仔提出來，就啥物攏毋驚矣。in嘛是講彼粒黨徽代表正氣正義，有克邪的力量。哈哈，國民黨按呢共阮洗腦。」
另外一位女子也捌（曾）做過記者，講第一遍去採訪車禍新聞，看著死亡的少女時，目箍紅起來，講，「真可憐！」伊的前輩查埔同事隨tshuā（帶）伊去附近的廟拜拜，慎重共伊講，「看著這款場面，念阿彌陀佛就好，千萬毋通表達你的感情，咱毋知影亡靈聽著溫情的話，會按怎回應；無定著會倚靠來。」
過無幾日，和文友做伙開講，Y講起有一遍伊和兩个朋友欲去陽明山馬槽洗溫泉，約佇○○病院會合。三个人出發前，伊去便所；啥人知影便所出來伊就開始吐，一直吐，一直吐。明明是好好人出門，哪會一時變做按呢？伊想袂曉。結果去到馬槽，猶咧吐，伊無浸溫泉；轉到厝，人煞好起來，無代誌。
伊講，「毋是著痧（中暑），我真確定彼日我佇病院內底予啥物煞著。轉到厝好起來，可能是阮厝的氣場較旺。」
F紲落（接著）講有一年伊和R去中國旅行，蹛（tuà，住）仝一間房。一日透早，R先落去樓跤了後，F發現一本廣告產品的冊倒蓋佇浴間的洗面台頂。伊感覺怪怪，R敢有可能佇遮看這種冊？趕緊落去問R，R一時面色驚惶，和F兩人隨轉去房間，彼本小冊無去矣。
兩人馬上去櫃台，要求換房間。
「服務人員一句話都無問，隨替阮換。可見彼間房毋是第一遍發生這款代誌。」
C講伊和兩个查某囝去日本旅行，少年人愛去人較少的所在，古蹟、古泉、古厝等等，一日行到一个足偏僻的所在，伊尿緊，不得已佇一欉樹仔跤解決。伊查某囝講毋知會去得失（冒犯、得罪）著啥物無，先共人會失禮較好，徛佇邊仔直直念su-mí-má-sián，su-mí-má-sián（日語，對不起）。C心內想，「烏白想，啥物怪論嘛。」徛起來的時，家己煞講： A-lí-gá-tooh（日語，多謝）。
逐家笑煞，F講in大官（公公）安葬的彼片公墓地，市政府有別項用途，所有的墓攏愛徙走。一日，為著欲辦這條代誌，in翁牽伊佇墓地款款仔（緩緩）行，不時會一聲「失禮」，伊應，「無要緊，免客氣。」啥時陣變曱遮爾客氣？牽無好勢險險仔予我跋倒？過後，in翁罵伊「豬頭」，「遐的墓有的已經徙走，塗跤坎坎坷坷，歹行，我驚去踏著啥人，才共in會失禮啊；心存敬意，總是較安全。」
講著另外彼个世界，我也有故事。
有一擺佮一陣同學去南部旅行，我和一个溫柔安靜的同學仝房間。兩人行到門頭前，伊共行李囥（khǹg，放）佇跤邊，用指頭仔敲門，講「攪擾」，才共開鎖的感應卡插入去。
我問伊是驚有人佇內面？伊笑笑，無回答；門開矣，伊恬恬佇邊仔徛一時仔，等兩人入去房間，門關好才共我講，伊是驚會攪擾著「啥人」；相借問一下，請「伊」離開，借阮蹛一暝。哇，我一時起雞母皮，意思是這个房間內可能有啥神祕的「人」，也有可能伊拄才（剛才）對阮面頭前「飄」出去？
C講伊蹛旅社，也會按呢做，「毋管是實抑是虛的世界，心內存敬意和善念，就會相安無事。」
我繼續講，「有一擺佇旅社，我無敲門，雄雄入去，就看著……」
逐家目睭瞪大蕊起來。我慢慢仔講，「彼早我坐電梯落去，才想著烏目鏡囥佇門邊椅仔頂；轉去提，門拍開，看著一个頭殼包白布的人影；我驚一趒（tiô），目鏡提咧隨走。」
「啊？趕緊去櫃台換房間？」
「無啦，我若去講，可能會害彼个人無頭路，服務人員哪會使趁人客離開的時，利用浴間偷偷仔洗頭毛？伊閣毋是摒掃（打掃）的人。看著我的時，伊嘛掣（tshuah，嚇）一大趒，彼个少年的應當有得著教訓矣。」●
網友回應