【自由副刊】我的通行台語詩之路

我的通行台語詩之路

◎李敏勇 圖◎歐笠嵬

我是台灣詩人。雖然我通常用漢字中文書寫，嘛認為漢字佇父母語有某種地位，有時亦會用漢字台文書寫。但是，語言的問題意識存在佇我的腦海，提醒我面對。從「符號」、「工具」、「方法」以及「精神」的層次，佮「認識」、「記錄」、「思考」、「批評」的面向。我注意我的台灣詩人朋友們努力實踐著的「母語」寫作，觀照著其中的光佮影。台灣的無國家歷史以及被殖民經驗，無佇這個島嶼形成語言及文化的主體性。咱的新文學歷史烙印日本語佮中國語（漢字轉化的話文）的形跡，致使語文主體性重建的文化工程，有多重面向：漢字台文、漢羅台文、全羅台文，並嘸是完全是主體性的恢復。

秀異詩人們的母語處境

波蘭詩人米洛舒（C. Milosz，1911-2004）佇伊的詩〈我忠實的母語〉內面的母語論，並無法度真實反映台灣詩人的處境。我多次引述這首詩，講到C. Milosz流亡佇美國期間，堅持用波蘭文寫詩（伊嘛用英文寫散文）。我欣羨伊有會得通效命的母語，嘛欽佩這位波蘭詩人對語言祖國的真心。但是，我嘛佇C. Milosz講到伊的母語時，看到伊講伊有所懷疑，因為伊認為波蘭語佇共產統治時，變成降格的語言，伊用「告密者的語言」、「迷亂的語言」講伊的母語處境。佇台灣，咱的母語沒這款墮落現象嗎？共款的政治佮商業公害是不是造成病理？給人感動的是，C. Milosz講伊是拯救波蘭語的人，伊會努力給伊的母語光耀佮純粹，用災難中需要的秩序佮美。

請繼續往下閱讀...

關於詩人的語言，特別是母語問題。猶太裔的詩人保羅．策蘭（Paul Celan，1920-1970）的情況，是另外一種事例。出世佇前奧匈帝國解體後羅馬尼亞境內的保羅．策蘭，細漢的時受德語教育、羅馬尼亞語教育以及希伯來語教育。後來，伊的家鄉被併入烏克蘭，有一段時間，伊是蘇聯公民。1941年，希特勒入侵蘇聯，伊的父母被抓入集中營，伊嘛佇彼強迫勞動。戰後，伊逃亡到維也納，轉往巴黎。用德語寫作，被認為是二次大戰後最重要的歐洲詩人，德語是伊的母語之一，也是迫害伊父母，造成伊人生苦難的語言。

南非小說家柯慈（J.M.Coetzee，1940-），2003年諾貝爾文學獎得主，伊講保羅．策蘭的詩是以迫害伊父母的德國人語言書寫的，比起伊的希伯來文、羅馬尼亞文，更加是伊的表述工具。伊的對德語的信念，反映出一個猶太人的實證觀念，「德語是伊的語言，是一種複雜、爭執和痛苦的語言。」保羅．策蘭以對決的姿勢運用德語。柯慈引一位歷史學家的看法，講伊「做一個偉大的德語詩人，擱做一個佇集中營陰影下面成長的年輕中歐猶太人」是太大的負擔，致使伊佇1970年，五十歲的時陣投水自殺。佇咱台灣，對決通行中文華語，應該亦存在這款課題。

愛爾蘭詩人葉慈（W.B. Yeats，1865-1939）以「英語屬於愛爾蘭，但愛爾蘭不屬於英國」來因應大英帝國殖民留下的語言問題，他的積業發揚愛爾蘭的榮光。除了北愛，愛爾蘭大部分獨立為一個新的國家。本土的蓋爾語和英語通用，但獨立的愛爾蘭佮英語並行干若無矛盾。這是因為國家獨立帶來的自信。拉丁美洲獨立以後，殖民者留落來的西班牙文和葡萄牙文，法語、英語，甚至德語，成為拉丁美洲諸國的通行語文。殖民者在地化成為新國家的國民，殖民語言成為母語的特殊歷史際遇和情境，交織十字架佮劍的光影。尼加拉瓜詩人魯本．達里歐（Ruben Dario，1867-1916）是西班牙現代主義詩歌運動奠基者；米絲特拉兒（智利，G. Mistral，1889-1957）、聶魯達（智利，P. Neruda，1904-1973）、帕斯（墨西哥，O. Paz，1914-1998），分別在1946年、1971年、1990年得到諾貝爾文學獎，顯現了拉丁美洲詩的榮光。

語言文字衝突文化現實

詩的語言狀況反映歷史際遇和文化情境。台灣詩共款面對這種考驗佮挑戰。無表述文字的原住民語，和有漢字性質的福台語、福客語，以及漢字中文，佇台灣的土地有形成的時序差別，亦有共時性。無共款語族的台灣人，母語無共款。無共款母語的台灣人，攏佇戰前、戰後受殖民統治的語文教育，致使台灣文學呈顯多元、多音交響的狀況。不過，戰後殖民性無真正想欲在地落實，以及累積的專制、壓迫、文化破壞，意圖使通行中文「國語化」，但是國家又擱是殘餘、虛構、他者的中國性質。語言文字的矛盾、衝突存在佇當下的文化現實。佇這款現實中，台灣詩人重建母語的努力顯現複雜的事況，干若佇語文的叢林法則中競鬪。每一個有心的詩人攏有自己的鼓吹，自己的調。

我習慣用漢字台文書寫。相對羅馬字是外來的，漢字無完全是外來的。四百年史所講的，早期的移入者祖先有漢字的傳統，但是世代傳承的台灣人真濟是有唐山公無唐山媽的後代，融合著平埔族血統或原住民血統。真遺憾咱佇台灣的祖先無親像朝鮮佮日本，轉化漢字為朝鮮文字、日本文字，在口語化的語音條件提供了充分的可能性。漢字的台文佇語音方面的局限造成羅馬字運用佇通行台語（福台語、福客語、原住民語）的現象。真方便，但是這嘛是大航海時代帝國殖民世界的歷史，講是外來嘛是外來。

詩的語言不只是「符號論」的層次，也是「工具論」、「方法論」，以及「精神論」的層次。特別是「精神論」。詩的精神論有「認識」、「記錄」、「思考」、「批評」的各種面向。用漢字中文書寫，面對這款的考驗佮挑戰。用任何的語文書寫，攏面對這種課題。從出版《一個台灣詩人的心聲告白》到這陣，已經十六年。陸陸續續我用漢字台文發表一寡詩佮歌。雖然我無參與台語文的書寫團體，我嘛無真濟台語文作品，但是我關心這個面向。

我嘛會繼續佇通行台語的書寫之途繼續努力，希望會得通佇咱的國度為多音交響的台灣語文譜現愈濟的光采。●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法